De Outlänger
De outlänger
‘t war an ‘nem Sunndagmuorgen im Mäi. Für sinem House stund de Boure Wigges. Häi hadde bäide Aarme up d’m Toune liggen un raukede out siner kourten Pipe ‘ne Sorte, de häi jümmer qualmede, wann häi am Immenstande te dauhn hadde. ‘t wor wuoll richtiger Tabak, äwwer nit üöwwer ‘t Water ekummen. Wigges hadde dat Krout selber in sinem Huowwe tuoggen, un wann ‘t auk nit vill bietter smachte osse de Blädere von d’n Kiesperbeimen, de im Krieje härhallen moßten, sau wor Wigges doch nit wennig stolz oup sin Fabrikat. En paar Skridde widder stund sin Knaicht Philipp un gaf sinem Hären im Rauken nix noh. De baiden woren in gudder Stimmunge, dat konnte me glik sehen.
Up d’r anderen Siede von d’r Strothe, de an Wigges House härging, wor en deeper Waterkump. Out enner gudden und starken Quelle nit wqiet dovon flaut dat helle Water dür ‘nen hölternen Stock in d’n Kump. Up d’m Rande vom Kumpe sat de Nower Iggel un let dat Water dür sine Hand fleten. De Sunne stund räide hou am Himmel, un ‘t wor häit.
„Hiet räide ‘ne Imme swirmet?“ fruoget Nower Iggel un slenkerde mit d’n Bäinen.
„‘t is wuoll na en bitzken freuh; äwwer wann dat Wiedder sau bliwet . . . . en Schwarm im Mai is wärt en Feuder Heu.“
De Boure Wigges kratzede sick hinger d’n Auren und qualmede nach härter.
„Bist du anderer Mäinunge?“ fruogte Iggel.
„Nä, dat nit, ick denke gerade sau, äwwer düttmol . . .
„Na, düttmol? Watt witt’e domidde sägen? Isset watt besonderes?”
Jö! Do haww ick sau ‘ne Imme, ‘t is en Outlänger en Italjäner, de skint me nit sau ganz richtig.“
„Watt, en Outlänger, en Italjäner? Wo bist’e do dranne kummen?“
„Ick haww ’n upü d’r Outstellunge gewunnen; äwwer de Biester passet gar net bie de anderen. ‘t is en unruggig Volk, diem me am besten dree Skridde vom Liwe bliwet. Watt will dat erst giwwen, wann de swiermet! Häi ligger räide dichte für; ick gleiwe, häi geiht balle af.“
„Water!“ siegte de Nower: „Water!“
„Water?“ fruogte Wigges, „bu mainst edat?“
“Water un jümmer Water bim Swiermen, mit d’r Spritze, mit d’r Getekanne un d’m Kuokeliepel, natmaken dat hilpert.”
„Dat is je nu gerade kenn ganz nigge Middel; äwwet äwwer bi düsser unruggigen Gesellschaft anslett?“
„Up jeden Fall; me moddet äwwer richtig anfangen.“
Iggel stund up; Wigges un sin Knaicht nahmen de Pipen out d’m Moule un de Aarme von Toune. Vom Kirktoren rep de Klocke; ‘t wor dat Täiken taum Beginne d’r Kierke.
„Hai swiermet! De froümmede Imme swiermet!“, rep am anderen Muorgen Philipp. Osse dat de Häre horte, ahnte häi nix Guddes un bekam en kläinen Skrecken, so dat häi hastig upsprung.
„Water, Philipp!“ wor sin erste Woort.
„Getekanne, Pott un Kuokelieppel stoht räide perot, Häre!“ Stopp häi sick de Pipe, mine dampet räide.“
„Ick kumme balle, Philipp; paß bloß gout up, äff häi sick settet un wohinne!“
„Un wann häi assgäit?“
„Dann makest dou hingerhär. Vorwärts! Ick kumme.“
Philipp wor te bouten, un balle drnoh auf de Häre.
„Häi settet sick, häre; kucket doh! Is da en Swarm!“
„Ick sehet wuoll; äwwer dat Unglücke! Moßte häi sick auf nou gerade an d’n swanken Ast vom Bärenbaume setten! Huoll de Läddere, Philipp!“
„jo, glik, häre! Nä, is dat en Swarm; de mott auk en Künnig howwen, ganz gewiß.“
Phikipp slippede de Läddere herbi. De Immen satten sick fester.
„Nä, wat en Swarm! Sau, häre, nou kann’t dran gohn!“
„Sachte, nit sau glikgüllig mit d’r Läddere, sachte!“
„Un de Immenkappe niddeniemmen, Häre!“
„Jo, ick gleiwe, de Tabak skiket. Hall feste, Philipp!”
“Kenn Suorge, Häre!”
Wigges stigete up d’r Läddere in de Hödde un hadde en ImmenKuorf ungerm Aarme. Dichte giggen d’r Läddere wor en Baunenfeld, un de Baunenstangen rageden in de Aeste vom Bärbaume. De Läddere swankede. „Hall feste, Philipp!“
„Kenne Suorge, häre!“
Wigges kam glücklek rup un hadde nou d’n Schwarm dichte für sick. Häi qualmede osse en Skuornstäin, hel d’n lieddigen Kuorf ungern d’n Swarm und sküddelde am Aste.
„Hall feste, Philipp!“
„Kenn Suorge, Häre!“
Philipp kuckede in de Hödde. „Wat en Swarm Häre!“
Osse häi nou d’n Kopp na hödder reckede, kriegte sine Kappe ‘t Ueöwergewichte, rutzkede un fel in de Baunen. Häi woll se fangen.
„Hall feste, Philipp!“
„Kenne Suorge, Häre!“ Hai let de Kappe liggen un kuckede widder in de Hödde.
Do loste sick up enmol en Klümpeken vom Swarm, fel, fel dichte am Kuorwe runder und Philipp in sine krousen Hoore.
„Unglücke“, rep Philipp, un sine Bäiden Hänge fluoggen no sinen Koppe, wo ‘t krimmelde un wimmelde.
„Hall feste, Philipp, hall feste! De Läddere wackelt. Ick bawwe de Immen balle im Kuorwe; is dat en Swarm!“
Aewwer kenne Antwort kam mei von ungene. „Water, Water!“ konnte häi d’n Philipp nach raupen hören; dann neigede sick de Läddere noh d’r Side, rutzkede vom swanken Aste af, un Wigges purzelde Koppüowwer mit Kuorf un Pipe twisken de Baunenstangen.
„ Dunnerkiel! Water, Water!“ rep enne Stimme out d’n Baunen, un dann brousedet out d’n Stangen, osse wann en Keiler, de aneskuotten is, out d’m Uengerholte kümmet. Ueöwwer Getekanne un Pott gaidet, un dann en Plumps!
Wigges hadde sik koppüöwwer in d’n Kump estüörtet. Osse häi sick nou widder router kraspelde un nit wennig proustede, do wor häi up enmol ganz verdutzt un verbiestert. Balle gloffte häi, häi söh en Gespenst. Im Kumpe wor nach enne Gestalt, de, bloß mit d’m Koppe üöwwer d’m Water, Wigges mit grauten Augen anstarrte.
„Dau Philipp?“
„Jo ick auk, häre! Sitt Säi auk von d’n Biestern annefallen un Tauerichtet?“ Dobi krätzede häi sick bitterbeise in d’n Hooren.
Dunerkiel, dütt Unglücke!“ jammerde Wigges un kratzede sick auk an villen Stellen, wo ‘t nitwenigg juckede. Dütt Unglücke! Ick haww ‘t je glik esiegt. Düsse Italjäner! Un Hals un Bäine konnten dobi kaput gohn, Philipp!“
„Ick konnte nit mei, Häre; en ganzen Klumpen wor mi in de Hoore fallen. - - Duck häi sick, Häre, se kummet!“
„Summ, summ, summ!“ Do kam üöwwer d’n Toun, üöwwer de Strohte, üöwwer d’n Kump. De Bäiden Köppe verswungen unger d’m Water, kamen dan widder taum Vürskin.
„Do gait häi hinne, Häre!“
„Ick wünske d’m Outlänger gudde Räise un huolle de Sakramenter nit widder. Mit sülker Sorte will ick nix mei te dauhn hawwen. Minetwägen kann häi widder üöwwer de Alpen noh Italien flegen; düsse Outlänger dogget olle nix.“
„Raicht ma häi wuoll hawwen, Häre; äwwer ‘t is doch skade ümme de Imme. Watt wor dat für en Swarm!“
„Ennerlejje! De Outlänger will ick nit mei. Nou lot uns äiwwer sehn, dat wi widder aut d’m Kumpe kummet. Dat Water mag für Villes gout sin, äwwer ick hawwe nou genog dovon.“
„Ick auk.“
De bäiden krawwelden sick out d’m Water un kamen glücklek up d’n Rand vom Kumpe.
„Häre!“
„Philipp!“
„Jo, wäit häi, worüöwwer ick nu auk frauh si?“
„Na?“
„Jo, dat dütt kenn Jaucheloch ewiest is, in dat wi sprungen sit.“
____________________
Aus: Landauf, landab – Geschichte und Geschichten aus dem Waldecker Land, von Christian Fleischhauer
(C) 2011 - Alle Rechte vorbehalten